ILOILO CITY – Ginahulat na lang ni Iloilo City Mayor Jerry Treñas ang guidelines halin sa Department of Justice agud nga mapasakaan sang kaso ang mga madakpan nga nagalapas sa curfew kadungan sang ginapatuman nga Enhanced Community Quarantine.
Sa interview sang Bombo Radyo kay Treñas, iya ginpahayag nga subong nga wala pa ang guidelines, dakpon kag ikustodiya sang otoridad ang mga nagalapas sa curfew umpisa 8:00 sa gab-i tubtub 5:00 sa kaagahon.
Suno kay Treñas, wala sang presuhay nga matabo sa baylo, ikustudiya sang otoridad kag ibutang sa gym sa sulod sang 12 ka oras ang magalapas sa curfew.
Ginpahayag ni Treñas nga dapat sundon ang curfew agud nga makatulog kag makapahuway sang temprano kag agud nga indi malatnan sang Coronavirus Disease 2019 (COVID-19).
