ILOILO CITY – Duha na lamang ka tuig ang serbisyo sang mga magadaog nga barangay officials sa 2023 Barangay and Sangguniang Kabataan Elections sa Oktubre 30.
Sa interview sang Bombo Radyo kay Mr. Jonathan Sayno, Election Assistant II sang Commission on Elections- Iloilo City Field Office, iya ginpahayag nga base sa nangin pinakaulihi nga ruling sang Supreme Court, ang Barangay and Sangguniang Kabataan Elections ang dapat nga patigayunon sa tagsa ka tatlo ka tuig.
Una na nga gindeklarar sang High Tribunal nga unconstitutional ang layi nga naga-postpone sa pagpatigayon sang Barangay kag Sangguniang Kabataan Elections nagikan sa initial schedule nga December 5, 2022 sa Oktubre 30 subong nga tuig.
Sa pihak sini, ginkilala sang Supreme Court ang legal practicality kag ang kinahanglanon sa pagpadayon sang eleksyon sa Oktubre 30 bilang pagsunod sa operative fact doctrine.
Suno kay Sayno, ang masunod nga eleksyon ang patigayunon naman sa 2025 gani, may duha na lamang ka tuig nga nabilin nga serbisyo para sa mga magadaog nga opisyal.
Bangud nga sang nagligad pa nga tuig kuntani ang eleksyon, ang mga interim barangay kag sangguniang kabataan officials ang yara sa hold-over capacity lamang apang indi man apektado ang ila nga benepisyo.
