Ginpasalig nanday Senator Kiko Pangilinan kag Quezon 1st District Rep. Mark Enverga nga matun-an ang mga problema sa industriya sang tubo kasunod sang ginpatigayon nga public consultation sa Talisay City, Negros Occidental.
Si Pangilinan amo ang chairperson sang Senate Committee on Agriculture, Food, and Agrarian Reform, samtang si Enverga amo man ang chairperson sang amo man nga komitiba sa Kamara.
Ang ginpatigayon nga congressional inquiry ang nag-ugat sa mga separado nga resolusyon sa Kamara nga nagahingyo nga malantaw ang pagsarurot sang mill-gate prices sang kalamay kag molasses kag ang epekto sini sa sugar producers, mangunguma, kag ila mga trabahador.
Yara man ang representative gikan sa nanarisari nga sugar federations, mga tiglawas sang Sugar Regulatory Administration (SRA) kag iban pa nga national agencies kag local public officials.
Ang kada sugar federation ang ginhatagan man sang tyansa nga makapabutyag sang ila concerns.
Ginpangayo naman nanday Pangilinan kag Enverga ang demand letters gikan sa tagsa ka sugar federation.
Suno kay Pangilinan, kaangay sa kun paano nila ginsolusyonan sadto ang problema sa bugas, hatagan man nila sang solusyon ang problema sa kalamay.
Pahayag pa ni Pangilinan, indi lang padayaw-dayaw ang public consultation kundi isa ka importante nga tikang nga mapakita sang konkreto nga solusyon sa isyu. Ginpasalig man sini nga dal-on ang problema sang amo nga industriya sa Malacañang.
‘KAMI GID ANG MAKALULUOY’
Nagakahangawa naman ang mga Ilonggo nga nagatrabaho sa kampo nga madulaan man sila sang palangabuhian kun magpadayon ang krisis sa industriya sang tubo.
Lakip sila sa nag-upod sa protesta sang sugargane workers sa syudad sang Passi subong nga semana agud magpanawagan nga maghulag na ang gobyerno sa tunga sang pagsarurot sang presyo sang kalamay.
Sa interview sang Bombo Radyo kay Terry Balboa, isa ka trabahador sa kampo, iya ginpahayag nga maapektuhan gid sila pananglitan mag-untat sa pagtanum sang tubo ang ila nga amo.
Suno kay Balboa, madamo sa ila ang wala man sang kaugalingon nga uma, kag ang kampo lang gid ang ila ginasaligan nga trabaho.
Pananglitan madulaan sila sang trabaho suno sa iya, makaluluoy gid ang ila kahimtangan bangud maapektuhan pati ang pag-eskwela sang ila kabataan.
Subong suno sa iya, pagkatapos nga nakapatapas na sang tubo, wala anay gintandog ang duta sang iya amo bangud sa problema subong sa sugarcane industry.
Matandaan nga ginpangunahan sang Jalasig Sugar Planters Association ang demonstrasyon sa syudad sang Passi. Ginapanawagan nila ang pag-akto sang gobyerno sa tunga sang tuman ka nubo nga farm-gate prices kasunod sang pagpanglakaak sang pag-import sang kalamay kag kapalpakan sang SRA nga ma-regulate ang merkado.#
