ILOILO CITY- Nagtingob- pwersa man ang pila ka kongresista sa pag-pagfile sang counterpart joint resolution sa Kamara agod nga i-revoke ang Executive Order 128 ni Presidente Rodrigo Duterte nga nagapanubo sang tariff rate sang pork imports.
Ini kasunod man sang joint resolution sang Senado nga nagatuyo nga i-revoke ang EO sang presidente.
Sa interview sang Bombo Radyo kay Iloilo 2nd District Representative Michael Gorriceta, co-author sang amo nga resolution, iya ginpahayag nga ang nasambit nga executive order ang kabaylo sang palangabuhian sang 2.5 milyon nga mga local farmers/ hog raisers/ pork producers nga lubos nga maapektuhan sa diin 65 porsiyento sa mga ini ang mga pigado nga ‘backyard raisers’ lang.
Suno sa iya, ang madula nga P14 bilyon nga kitaon kuntani gikan sa taripa ang mahimo nga magamit pa sa paghatag sang ayuda sa pumuluyo ukon ibakal pa kuntani sang mga kinahanglanon sang mga tawo sa tunga sang ginapangatubang nga krisis dala sang pandemya.
Ginpahayag sang mamalidha nga sa subong, padayon ang ila signature campaign para sa amo nga joint resolution.
Nahibaluan nga sa idalom sa EO 128, ang tariff rate para sa imported pork meat nga nasulod sa quota ukon minimum access volume (MAV) ang yara sa 5% sa una nga tatlo ka bulan sa pagsugod sang pagpatuman sang EO kag 10% para sa ikaapat tubtob 12 ka bulan.
Ang tariff rate naman para sa imported meat nga wala nakasulod sa MAV, ang gintalana sa 15% para sa una nga tatlo ka bulan kag 20% para sa ikaapat tubtob sa ika-12 nga bulan.
Ang existing 30% tubtob 40% nga tariff rate para sa imported pork ang ibalik pagkatapos sang 12 ka bulan.
