ILOILO CITY – Indi mapat-od sang Department of Labor and Employment Region 6 kun bala maaprubahan ang ginaduso sang duha ka mga labor groups nga dugang nga 100 pesos nga daily minimum wage para sa mga private workers sa Western Visayas.
Sa interview sang Bombo Radyo kay Atty. Sixto Rodriguez, Jr., Director sang ahensya, iya ginpahayag nga ang mga nabaton niya nga petitions ang nagikan sa mga grupo nga ginalakipan sang United Labor-Western Visayas sang Pebrero kag Iloilo Pepsi Cola Workers Independent Union sang Marso.
Suno kay Atty. Rodriguez, ang approval sang petition ang nakadepende sa mga myembro sang Regional Tripartite Wages and Productivity Board 6 nga ginalakipan sang Department of Labor & Employment, Department of Trade and Industry, National Economic and Development Authority, duha ka mga representatives halin sa mga employers, kag duha man ka representatives halin sa mga employees.
Ang Regional Tripartite Wages and Productivity Board ang maga tsekyar kun bala may yara sang legal basis nga ma-grant ang petition.
Sa bahin sang mga labor groups, ang P450 nga minimum daily wage sa rehiyon ang indi bastante para sa kinahanglanon sang mga mamunugon bangud sa nagatimbuok nga inflation.
