ILOILO CITY – Naglab-ot sa halos P2.5M sa isa ka adlaw ang kapyerdehan sang mga mangunguma sa Benguet bangud sa nagataas nga kaso sang smuggling sa carrots.
Sa ginpatigayon nga senate hearing, ginpahayag ni Agot Balanoy, public relations officer sang grupo, nga ang volume sang smuggled carrots ang nag-doble pa halin sa 20% sang tuig 2021 kag nagtaas na sa 40% subong nga tuig apisar nga gina-confiscate sang gobyerno.
Bangud sini suno kay Balanoy, nagnubo man ang order sa ila kag nagdangat gid sa P2.5 million kada adlaw ang kapyerdehan sang mga mangunguma.
Suno kay Balanoy, mas ginapili sang mga kunsumidor nga magbakal sang utan nagikan sa China bangud mahimo ini nga maglawig sang duha ka bulan kun ikumpara sa local products nga nagalawig lang sang duha tubtob tatlo ka adlaw.
Suno naman kay Senate President Vicente Sotto III, dapat nga imbestigaran ini sang otoridad bangud mahimo nga ang mga imported nga utan ang ginbutangan sang kemikal agud nga maglawig ang iya shelf life.
Ang Senate Committee of the Whole ang naga-imbestigar na sang nagadamo nga smuggled agricultural products sa Philippine market kag gina-imbestigaran naman ang Bureau of Customs nga mahimo may yara sang kaangtanan sa smuggling.
