ILOILO CITY-Ginakalangkagan na sang asosasyon sang mga mangunguma ang pag-abot sang adlaw nga mangin fully operational na ang Jalaur River Multi-Purpose Project II sa Calinog, Iloilo bangud panigurado nga dako ang mabulig sini sa 25,000 ka mga myembro sang sektor.
Sa interview sang Bombo Radyo kay Ruben Carbo, Presidente sang LAMGUICAN Irrigators Association nga sakop sang Barangay Lampaya, Guiso, kag Canabajan sa nasambit nga banwa, iya ginpahayag nga ang average nga patubas nila sa subong sa isa ka ektarya ang yara sa 60 ka sako kag ginalantaw sini nga liyabe kag sabat agud mapasangkad pa ang ila patubas amo ang Jalaur River Multi-Purpose project bangud sa mas ginpalapad pa nga irrigation service area sang National Irrigation Administration (NIA) sa 9,500 hectares sang rain-fed agricultural land.
Suno kay Carbo, indi na sila magkahangawa pa kun mainit ang tyempo bangud may yara na sang bastante nga tubig nga mahatag para sa ila pananom.
Kun kaisa pahayag niya, ang problema amo ang mindset man sang mangunguma apang amat-amat naman ang mga ini nagakooperar subong bangud sa manami nga proyekto sang gobyerno.
Dugang pa sang natungdan, wala na sang “wait and see attitude” sa mga mangunguma subong ilabi na sa myembro sang organisasyon bangud kun sadto wala nagatambong ang mga ini sa pagsinapol, sa subong nagapasakop na sila agud mahatagan man sang ihibalo.
Ginalauman nga mapataas pa ang rice production sa 338,874 metric tons sa kada tuig, mas mataas sang 71.54 percent kun ipaanggid sa subong nga produksyon nga yara sa 197,545 metric tons.
