ILOILO CITY – Indi makabaton sang fuel subsidy ang mga mangunguma nga nagatanom sang palay kag utan suno sa Department of Agriculture.
Suno kay DA Undersecretary Kristine Evangelista, ang mga nagatanom sang mais kag ang mga manugpangisda gid lamang ang mahimo nga makabaton sang P3, 000 nga fuel subsidy nagikan sa gobyerno.
Ginklaro ni Evangelista nga ang mga mangunguma ang may yara sang cash grant nga Rice Farmer Financial Assistance (RFFA) kun sa diin makabaton sila sang P5,000 nga cash aid.
Dugang pa ni Evangelista, ang ahensya ang nagahatag sang mga truck sa mga mangunguma nga nagatanom sang high-value crops kag utan pinaagi sa ila kooperatiba.
Ang DA ang may yara sang P500 million nga budget para sa assistance pinaagi sa paghatag sang fuel discounts para sa mga mangunguma kag manugpangisda nga nagapanag-iya sang agricultural kag fishery machinery ukon naga-operate pinaagi sa farmers organization ukon kooperatiba.
Nahibaluan nga nagdangat sa ginabanta 160,000 ka mga mangunguma kag manugpangisda ang makabaton sang P3,000 fuel subsidy nagikan sa gobyerno agud nga mahagan-hagan ang epekto sang sunud-sunod nga pagsaka sang presyo sang gatong sa ila pangabuhian.
