Nagpangatubang sang problema ang mga mangunguma sa Barangay Botong, Banwa sang Oton bangud sang baha nga nag-apekto sa ila mga talamnan, kag ang problema sa kanal nga wala nakay-o, kag wala lutsan ang tubig.
Sa interview sang Bombo Radyo kay Cedrick Corbett, Farmers Assistant President sa Brgy. Botong, Oton, ginpahayag niya nga ang pila ka mga mangunguma napilitan mag-harvest sang ila humay antes pa man mag-abot ang Bagyong Opong agud indi ini maapektuhan sang baha.
May mga talamnan nga lubog na sa tubig, kag ang masubo pa, may mga humay nga bag-o pa lang ginsab-og nga posible malu-o kag kan-on sang mga kuhol kun magpabilin pa ini nga mahulom sa sulod sang duha ukon tatlo ka adlaw.
Ginsiling pa ni Corbett nga ang iban nga mangunguma, magsab-og pa kuntani sang humay, pero bangud sang baha kag kanal nga wala lutsan sang tubig, indi sila makapadayon.
Ginpanawagan man niya nga tani mabuligan sila sang mga otoridad sa pagkay-o sang kanal agud indi na magbalik-balik ang problema.
Sa Barangay Botong, may sobra 75 ka hectare nga talamnan nga pirme ginabaha kun may ulan.
Nagapanawagan ang mga mangunguma sang tikang halin sa lokal nga panguluhan agud masolusyunan ang problema sa kanal kag maprotektahan ang ila pangabuhian.
