Dako nga bulig para sa mga mangunguma sa Concepcion, Iloilo ang mga machineries nga ihatag sang Department of Agriculture.
Sa interview sang Bombo Radyo kay Mayor Raul Banias, iya ginpahayag nga duha ka mga farmers association ang makabaton sang tag isa ka set sang modern farm implement.
Suno kay Banias, nagalaum siya nga sa masunod nga semana maabot na ang mga equipment sa diin mismo ang mga mangunguma amo ang ma-operate sini kag ma-manage.
Ang katungdanan lamang sang local government unit sang banwa amo nga i-monitor ang mga mangunguma sa ila paggamit sang equipment.
Nagpangabay man ang alkalde nga kun mahimo indi lang paglimitahan sa isa ka barangay kun sa diin kadam-an sang mga katapo sang asosasyon naga-istar kundi ipa-arkilahan man ang mga equipment sa iban pa nga mga mangunguma.
