ILOILO CITY – Nagapanawagan sang bulig sa Iloilo City Government ang mga myembro sang Association of Stall Owners and Transient Vendors (ASTRAVEN) nga apektado sang ginapatigayon nga rehabilitation.
Sa interview sang Bombo Radyo kay Alyas Inday, tag-iya sang karinderya sa nasambit nga merkado, iya ginpahayag nga naintindihan nila nga luyag sang gobyerno nga mangin matinlo kag mabag-o ang Iloilo Central Market.
Apang suno sa natungdan, indi manigar nga makatuga man ini sang huol sa ila.
Humalin sang ginpasaylo sila sa ila bag-o nga pwesto, dako naman ang iya nagasto halin sa personal nga kwarta.
Ginpahayag sini nga ang stalls nga gintigana para sayluhan nila ang wala pa maubos kaayo sa diin wala pa ini sang pirtahan.
Humalin sang nag-umpisa sila nga magsaylo sang pwesto, nag-untat naman ang ila pagbaligya sa diin linibo ang nadula sa ila income kada adlaw.
Nagalaom man ini nga hatagan sila sang bulig sang Iloilo City Government kaangay na lang sang trapal nga gamiton nila sa tion nga magbubo ang mabaskog nga ulan.
Nahibaluan nga bwas na, Marso 16, ang deadline nga ginhatag sang Local Economic and Enterprise Office agud maubos saylo ang mga linya sang kuryente sa mga bag-o nga stalls sa merkado.
