ILOILO CITY – Ginareklamo sang mga market vendors sa Iloilo Central Market ang magutok nga temporary stall nga ginhatag sang Iloilo City Government.
Ini bangud indi bastante ang espasyo para sa mga gamit sang mga ini.
Sa interview sang Bombo Radyo kay Nonoy Vicencio, parlor owner, iya ginpahayag nga dismayado ini bangud limitado ang hulag sang mga ini sa tion nga magsaylo na sa diin wala sang lugar para sa shampoo bowl, electric fan kag manicure station ang shop.
Suno kay Vicencio, ini man ang magatuga sang pagsinala-sala sang mga maukod nga customers sang ila parlor shop.
Ginpahayag dugang sang natungdan nga nagakangilin ini sa shop bangud diri na siya nagtrabaho umpisa sang 1980.
Apisar sini, mangin masinulundon ini sa gihapon sa Iloilo City Government sa tion nga ipasirado na ang tanan nga merkado sa syudad sa Mayo 15.
Kaangay ni Vicencio, ginareklamo man ni Raquel Guelos, manugbaligya sang military supplies sa Iloilo Central Market ang espasyo sang ila temporary stall.
Sa interview sang Bombo Radyo kay Guelos, iya ginpahayag nga daw kaangay sa tangkal sang baboy ukon telephone booth ang kalaparon sang ila bag-o nga stall.
Suno kay Guelos, indi husto ang pagpahamtang sang mga ini sa temporary stall nga may limitado nga espasyo bangud kumpleto ini sa business license, Bureau of Internal Revenue kag Department of Trade and Industry business registration.
Ginpahayag dugang sang natungdan nga indi ini maghalin sa pwesto kun wala sang court order.
