ILOILO CITY – Ginasigurado sang mga manugbaligya sang palupok sa Barangay San Jose, Arevalo, Iloilo City nga lunsay pasado sa product standards kag otorisado ang mga firecrackers kag pyrotechnic devices nga ila ginabaligya.
Sa interview sang Bombo Radyo kay Barangay Kagawad George Sabio, presidente sang Arevalo Iloilo Retailers Association, iya ginpahayag nga Disyembre 23 sang nag-umpisa sila sa pagplastar sang ila nga mga kiosko sa amo nga barangay kag magatapos ang pagbaligyaanay sa Disyembre 31.
Ang ila nga lugar ang isa sa mga ginapahanugutan nga lugar sa syudad sang Iloilo sa pagbaligya kag pagbakal sang palupok para sa pagsug-alaw sang Bag-ong Tuig.
Ang duha ka iban pa nga ginapahanugutan man para sa buying and selling amo ang Circumferential road 1 – corner Iloilo East Coast pa-Capiz sa distrito sang Jaro kag Muelle Loney Street sa Iloilo City Proper.
Suno kay Sabio, tanan nga customer nga nagakadto kag nagapili sang palupok sa ila nga kiosko ang nagasunod man sa health protocols ilabi na sa pagsuksok sang face mask kag pagsunod sa safe distancing.
Nagapasalamat ang natungdan nga ginpasugtan sila sang Iloilo City Government nga makabaligya bangud kahigayunan na ini suno sa iya nga makadawa-dawa kag makabawi ang mga manugbaligya sa pamuraot nga ila naagyan bangud sang COVID-19 pandemic.
