Ginaproblema subong sang mga manugpangisda sa Batangas ang ila pangabuhian matapos ang pag-alburuto sang Bulkang Taal kahapon.
Nahibaluan nga ginpasaka kag nagapabilin sa Alert Level 3 ang alert level status sang bulkan matapos ang phreatomagmatic eruption activity sa sulod sang ginabanta isa ka oras.
Suno kay Bombo Correspondent Ariel Capuna— direkta sa Laurel, Batangas, iya ginpahayag nga sobra kanubo sang balor sang mga isda nga nagaresulta sang ila kapyerdihan sa kita.
Ini ang ginpalala pa sang padayon nga pagtaas sa presyo sang produktong petrolyo.
Suno kay Capuna, bantay sarado man sang Philippine Coast Guard (PCG) ang ila nga hulag subong sa tunga sang baybay bangud sa safety kag kahangawa sa posible pa matabo nga pag-alburuto sang bulkan.
Bag-o pa ang paglupok sang bulkan, sa regular nga inadlaw, ginatugutan ang mga manugpangisda nga magtinir sa tunga sang lawod sa sulod sang 24 ka oras agud nga bantayan kag pakan-on ang ila mga hinuptan nga mga isda.
Makita suno sa tungdan sa surface sang mga fish cage ang mga nagalutaw nga abu ukon baras naghalin sa bulkan.
Ang ulan sa Batangas kahapon ang may dala nga lutak nga nakaapekto sa pila ka mga pangabuhian.
Halos tanan man sa mga residente malapit sa bulkan ang nag-evacuate.
Sa subong suno sa natungdan, malinong kag kalmado na ang bulkan.
Dugang pa niya, wala man nagapabaya ang lokal nga gobyerno sang Batangas sa paghatag sang assistance ukon ayuda.
