Nagpaandam ang farmers’ group nga Samahang Industriya ng Agrikultura (Sinag) batok sa bakuna sa African swine fever (ASF) nga ginabaligya online.
Suno kay Sinag chairman Rosendo So, napahibalo na sini kay Agriculture Secretary Francisco Tiu Laurel Jr. kag sa Food and Drug Administration (FDA) ang gina-alegar iligal nga pagbaligya sang amo nga bakuna.
Bangud wala pa sang naaprubahan nga ASF vaccine sa Pilipinas nga may go signal na para sa commercial distribution, delikado para sa hog raisers suno sa Sinag nga magbakal lamang online bangud posible pa nga may malain nga epekto ini nga bakuna kag makapalapta pa gid sang balatian sa baboy.
Lakip man sa ginpasalig sang farmers’ group amo ang pag-obserba sa himuon sang gobyerno nga controlled vaccination sa probinsya sang Batangas agud nga ma-monitor man kun ano ka epektibo ang bakuna.
Una na nga ginpahayag ni Agriculture Assistant Secretary kag spokesman Arnel de Mesa nga magasugod ang ahensya sa pagbakuna sa mga baboy sa Septyembre 2 sa Lobo, Batangas nga amo ang natumod nga “ground zero” sang ASF outbreaks.
Ginpahayag nga 10,000 doses sang bakuna ang nakuha sang gobyerno paagi sa emergency procurement ang pagagamiton sa sini nga initial vaccination.
