JANIUAY, ILOILO – Mas mabudlay para sa mga manunudlo nga na-assign sa nabukid nga bahin sang pungsod ang pagpatigayon sang modular learning.
Sa interview sang Bombo Radyo kay Sheila Mae Marbebe, manunudlo sa Brgy. Quipot, Janiuay, Iloilo, iya ginpahayag nga kinahanglan nila nga magtalana sang schedule kun san-o dapat kuhaon ang module kag ang pagpasa sini agud nga indi na magbalik-balik ang mga ginikanan.
Suno kay Marbebe, magluwas diri, nagasakripisyo man sila nga mga manunudlo sa pag-print sang modules ilabi na nga kulang ang printer.
Ginpahayag ni Marbebe nga isa man sa ila ginakabalak-an amo nga wala sang may nagagiya sa iban nga mga estudyante ilabi na kun ang ginikanan ang indi man makahibalo magsulat kag magbasa.
Kun siya ang pamangkuton, ginpahayag sang natungdan nga mas pabor siya nga face to face classes na lang ang patigayunon.
