Nangin matawhay na ang pila kag pagbakuna sa grupo sang mga manunudlo sa COVID-19 vaccination site sa University of San Agustin kahapon, Hunyo 28.
Ini nga grupo sang mga manunudlo amo man ang una nga nagpalab-ot sang reklamo sa Bombo Radyo matapos naruya sa inoculation site sang ila nga scheduled date sang Hunyo 24 kag 25.
Santo sa una nga report, ginpahulat ang mga manunudlo sang kapin anum ka oras apang ginbawian man sang ticket sang ulihi bangud wala na sang nabilin nga COVID-19 vaccines.
Sa interview sang Bombo Radyo kay Mr. Jude Fabular, teacher sa Iloilo Central Elementary School nga amo ang nagaupod sa iban pa nga mga manunudlo, iya ginpahayag nga lain na ang sitwasyon kahapon bangud nangin tayuyon na ang proseso.
11 sa iya nga mga kaupdanan ang natigayon nga mabakunahan samtang tatlo naman ang wala na nakabalik bangud may yara sang importante nga trabaho sa eskwelahan.
Nagapasalamat man si Fabular bangud na-improve na sang city government ang proseso matapos nila ginreport ang naobserbahan nga lapses.
Una diri, mismo si Iloilo City Mayor Jerry Treñas ang nagpangayo sang pasaylo bangud sa naeksperyensyahan sang mga manunudlo sa vaccination site kag nagpromisa nga i-address sang COVID-19 team ang problema sang mga vaccine recipients.
