Doble ang pagtinguha sang mga manunudlo sa mga pampubliko nga eskwelahan sa Iloilo Province.
Sa interview sang Bombo Radyo kay Edwin Faunal Mosura, Assistant Principal for Governance and Learner’s Support sa Iloilo National High School (INHS), iya ginpahayag nga antes pa man gindumilian ang face to face classes, nakahimo na ang eskwelahan sang Learning Continuity Plan nga ginatawag nga modalities agud mangin tayuyon ang pagtuon sang mga estudyante sa tunga sang pandemya.
Ini amo ang online set-up, modular kag blended learning.
Ang blended learning amo ang pagtuon sang estudyante via online samtang may yara man sang ginahawidan nga module.
Bag-o ini ginpatigayon, nagsurvey man ang INHS sa mga estudyante sang ila preferred nga modality sa pagtuon.
Ginabase naman ang grading system sa written outputs kag performance task sang mga kabataan.
Sa mga estudyante nga indi makapasa sang output ukon naga-untat sa pagkuha sang module, ginapakig-angotan ang mga ini lakip na ang ila mga ginikanan sang class adviser kag guidance councilor kun may yara sang problema sa paminatasan agud mapasiguro nga indi mapauntat ang ila pagtuon.
Dugang pa sang manunudlo, via online man ginapatigayon ang class recognition kag commencement exercises.
