Ginpaidalom sa counseling ang mga ginaalegar imbolbado nga menor-de-edad sa pagpang-abuso sa 17-anyos nga solterito sa Balay Dalayunan sa Barrio Obrero, Lapuz, Iloilo City.
Sa interview sang Bombo Radyo kay Teres Gelogo, Head sang Iloilo City Social Welfare and Development Office, iya ginpahayag nga sa subong, ila ginausisa kon ano ka matuod ang ginapahayag pagpang-abuso kag pagpanakit sa 17-anyos nga solterito.
Suno kay Gelogo, napatawag kag naistorya na ang tanan nga mga menor-de-edad nga involve sa amo nga kaso, kon sa diin, tanan man ang nagpartisipar.
May mga bagay naman nga gintuad ang pila ka mga imbolbado nga ginakonsiderar man sang talatapan sa ginapatigayon nga conference kag counseling.
Nanindugan man ang talatapan nga insakto ang ila ratio sang house parents kag sang residents.
Nahibaluan nga nagaplano man ang Committee on Social Services sang Iloilo City Council nga dugangan ang numero sang mga personnel sa shelter facility agud nga mapasiguro nga safe kag bantay-sirado ang mga Child in conflict with the law ukon “CICL”.
