ILOILO CITY – Nagnubo ang numero sang mga kabataan nga na rescue sang mga otoridad bangud sa paglapas sa curfew for minors sa Syudad sang Iloilo sa 1st kag second quarter subong nga tuig.
Sa interview sang Bombo Radyo kay Police Capt. Shella Mae Sangrines, tagpamaba sang Iloilo City Police Office (ICPO), iya ginpahayag nga humalin sang Enero tubtub Hunyo subong nga tuig, nagdangat sa 483 ang mga narescue nga menor de edad.
Ini ang mas manubo kun ipaaanggid sa numero sang mga narescue sang nagligad nga tuig sa kaangay nga quarter nga nagdangat sa 662.
Suno kay Sangrines, ang pagnubo sang numero sang mga na rescue nga menor de edad nga nagalagaw sa dalanon pagpatak sang las 10:00 sa kagab-ihon ang bunga sang hugot nga kampanya sang ICPO kag Task Force on Moral and Values Formation.
Nangin dako naman nga bulig sa nasambit nga kampanya sang mga otoridad ang kooperasyon sang mga barangay officials.
