ILOILO – Ginpadangat na sa Department of Social Welfare and Development (DSWD) ang 10 ka mga menor de edad nga nadakpan nga nagapatigayon sang hazing sa PD Monfort North, Dumangas, Iloilo kagab-i, Disyembre 5.
Ang mga nagkaladakpan nga menor de edad ang ginalakipan sang duha ka babayi kag walo ka mga lalaki kag naga-edad ang mga ini sang 13 tubtub 16 anyos.
Ang duha sa mga nadakpan ang estudyante sa isa ka private school sa Barotac Nuevo, Iloilo kag ang walo ka iban pa ang estudyante sang barangay high school sa Dumangas, Iloilo.
Sa interview sang Bombo Radyo kay Police Major Joeven Arevalo, hepe sang Dumangas Municipal Police Station, iya ginpahayag nga ginpaidalom na sa counseling ang mga nadakpan nga menor de edad kaupod sang ila mga ginikanan.
Suno kay Arevalo, mismo ang mga barangay officials ang nagreport sang nasambit nga hazing.
Natukiban nga ang pangalan sang grupo amo ang UBA CHIE ukon naghalin sa tinaga nga ‘uba tsinelas.’
Ginpahayag nga ang grupo ang bago lang gintukod sa diin antes makasulod, kinahanglan nga ipaidalom sa hazing pinaagi sa pag paddle.
Gin-athag man ni Arevalo nga ini ang una nga insidente sang hazing sa iya nasakupan nga banwa humalin sang nagpungko ini bilang hepe sang Dumangas MPS.
Magapatigayon man sang aktibidad ang mga otoridad agud indi na masulit pa ang nasambit nga hazing.
