Mga merkado sa syudad, magasirado na 6:00 sang gab-i

ILOILO CITY – Alas-6 sang gab-i natalana nga masirado ang mga merkado sa syudad sang Iloilo.

Ini ang kasunod sa ginapatuman nga 8:00 sang gab-i tubtob 4:00 sang aga nga curfew.

Sa interview sang Bombo Radyo kay Charlie Chan, Federation President sang mga vendors, iya ginpahayag nga natalana man nga kuhaan sang swab sample para sa COVID-19 ang mga fish vendor sa LaPaz market sa Lunes, Agosto 10, 9:00am tubtob 11:00am sa Iloilo Diamond Jubillee Hall.

Suno kay Chan, ang nasambit nga lihok ang pamaagi agud nga samtang temprano pa matapna na ang COVID-19 bangud kadam-an sa mga manugbaligya ang nagapadulong man sa Iloilo Fish Port Complex.

Sa subong pahayag niya, gamay na lang nga mga fish vendor ang nagabaligya sa mga merkado bangud apektado ini sang lockdown sa Iloilo Fish Port Complex.