Nagpasalamat ang Land Transportation Office ukon LTO-6 sa Oplan Sagip Bata initiative sang Police Regional Office-6 (PRO-6) bangud ginahatagan sini sang atensyon ang problema sang ahensya may kaangtanan sa mga menor de edad nga nagamaneho sang motorsiklo nga wala sang lisensya.
Sa interview sang Bombo Radyo kay Atty. Gaudioso Geduspan II, Regional Director sang LTO 6, iya ginpahayag nga ginatuyo sang amo nga inisyatibo ang mahatagan sang nagakaigo nga laygay kag paggiya ang mga menor de edad nga nagamaneho nga wala sang licensya kag ang iban nga wala pa sang suksok sang helmet agud nga malikawan ang peligro nga dala sini sa ila nga mga kabuhi.
Suno kay Atty. Geduspan, posible nga wala pa sang nagakaigo nga ihibalo ang iban nga menor de edad parte sa responsable nga pagmaneho kag disiplina sa dalan rason nga tutukan ang mga ini sang ahensya upod ang iban pa nga partnered agencies agud nga mahatagan sang nagakaigo nga intervention lakip na ang ila man mga ginikanan.
Pagpaathag samg direktor, ang mga ginikanan dapat mangin una nga nagagiya sa ila mga kabataan agud matudluan sila sang husto nga pamatasan kag disiplina sa pagmaneho, bangud ang indi maayo nga pagdumala sang salakyan mahimo magresulta sa peligro indi lamang sa ila kaugalingon kundi pati sa iban pa nga nagagamit sang dalan.
Dugang pa ni Atty. Geduspan, ginpahanumdoman gid sang ahensya ang mga ginikanan nga indi pagtugutan ukon i-tolerar ang ila mga kabataan nga magmaneho nga wala sang lisensya bangud daku ang risgo sini.
