Dies porsyento sa gihapon sang church capacity ang ginapahanugutan kun magpatigayon sang misa sa mga parokya sa syudad sang Iloilo.
Sandig ini sa Executive Order No. 75 ni Iloilo City Mayor Jerry Treñas apisar panubuon na sa Modified Enhanced Community Quarantine (MECQ) ang status sang syudad umpisa sa Lunes, Agusto 16.
Sa interview sang Bombo Radyo kay Father Angelo Colada, director sang Jaro Archdiocesan Commission on Social Communications, iya ginpahayag nga makatilingala ini bangud 10% man ang ginhapanugutan samtang naka-ECQ ang syudad apang wala man sang mangin pagbag-o bisan idowngrade sa MECQ ang status.
Apisar sini, nagpasalig ang simbahan nga mangin compliant ini sa pagsulundan sang syudad.
Sa probinsya sang Iloilo nga subong napaidalom sa MECQ, 30 percent sang church capacity ang ginapahanugutan.
Mas halog ini nga pagsulundan bangud, kun matandaan, online masses lang ang ginpasugtan sang naka-ECQ ang probinsya.
