ILOILO CITY – Mas naghatag sang dugang nga kaisog sa progresibo nga grupo ang kamatayon sang kilala nga aktibista sa syudad sang Iloilo nga si Mr. Jory Porquia.
Ini matapos nga gindakop sang otoridad ang 42 ka mga miyembro sang progresibo nga grupo nga tuyo kun tani nga magpatigayon sang hublag protestasa Jaro Plaza.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga ang kamatayon ni Porquia ang naghatag sa ila sang dugang nga kusog agud nga ipakigbato ang kinamatarong sang mga sibilyan.
May kaangtanan naman sa kamatayon ni Porquia, tuyo kun tani nila suno kay Forro nga magkuha sang permit para sa ila caravan apang ang Inter-Agency Task Force na ang nagahatag sini kag indi ang Local Government Unit ukon ang Philippine National Police.
Ginpahayag ni Forro nga naghingyo sila sa mga pulis nga magpatigayon na lang sang programa sa Jaro Plaza apang wala sila ginpahanugutan apisar nga madamo na ang kondisyon nga ginplastar.
Hana na kun tani sila suno kay Forro nga magbiya sa Jaro Plaza agud nga magpauli apang hinali sila gindakop sang mga pulis kag gindala sa police station bangud sa civil disobidience.
Apat ka kaso ang igapasaka batok sa 42 ka miyembro sang progresibo nga grupo nga gindakop bangud sa tuyo nga pagpatigayon sang hublag protesta.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga nga maximum tolerance ang ginsunod sang otoridad apang nagpakita sang pagpamatok ang progresibo nga grupo.
Suno kay Sangrines, lakip sa violations amo ang civil disobidience bangud sa pagpatigayon sang mass gathering, pagpatigayon sang aktibidad apisar nga wala sang permit, paglapas sa Bayanihan to Heal as One Act kag ang paglapas sa Mandatory Reporting of Notifiable Diseases and Health Events of Public Health Concern Act.
Nahibalu-an nga 42 ka miyembro sang progresibo nga grupo ang gindakop kag gindala sa Jaro Police Station apang bangud sa ginapatuman nga physical distancing, ginpangitaan sang Iloilo City Police Office sang paagi agud may yara sang tiniran ang mga arestado.
