ILOILO CITY- Maga-deploy ang Compliance Team sang Iloilo City Government sang mga personnel sa palibot sang mga accommodation establishments may kaangtanan sa nagahilapit nga Valentine’s Day.
Sa interview sang Bombo Radyo kay Mr. Nestor Canong, head sang Compliance Team kag pinuno man sang Task Force on Morals and Values Formation, iya ginpahayag nga katuyuan sini nga mapunggan ang mga menor de edad nga magsulod sa mga lodging houses,motels,mga resorts kag iban pa nga kaangay nga establishments kun sa diin mahimo sila nga mabiktima sang mga sexual predators.
Suno kay Canong, naistorya naman niya ang tagdumalahan kag staff sang sini nga mga establishments agud striktuhan ang pagdumili sa mga menor de edad nga amo ang nasaad sa Regulation Ordinance No. 2015-447.
Nagpaandam man ini sa mga establishments nga magalapas sa ordinansa nga mahimo sila mangatubang sang multa kag pagkapreso sang tubtob isa ka tuig kag posible kanselasyon sang business permit.
