ILOILO CITY – Nagapangduha-duha sa gihapon ang mga motorista sa nangin pahayag ni Presidente Rodrigo Duterte may kaangtanan sa pag-suspende sini sa pagpahamtang sang doble plaka nga nasaad sa Republic Act 11235 ukon Motorcycle Crime Prevention Act.
Sa interview sang Bombo Radyo kay Felixberto Gansas Montefrio, Presidente kag founder sang Neutrals Phil-bikers Association Inc., iya ginpahayag nga wala pa sang kasiguraduhan nga matuman ang ginpahayag sang Presidente bangud pirmado na niya ini kag nangin layi.
Apang nagalaum ang mga motorista nga matigayon ang pag-untat sang doble plaka partikular sa atubang nga bahin sang motorsiklo bangud nagahatag ini sang huol.
Pabor lamang si Montefrio kun ang plaka ang yara sa likod nga bahin sang morsiklo apisar nga dugangan pa ang kadakuon sini.
Suno kay Montefrio, may yara man sang punto si Presidente Duterte nga panubuan ang multa sang mga motorista sa paglapas sa layi sa P10,000 tubtob P15,000.
Mahimo nga nakit-an man sang presidente ang pag-ugyon sang mga motorista sa ginpatigayon nga Unity Ride sa pagpamatok sa nasambit nga layi.
Nagapati man si Montefrio nga nagakadapat may yara sang implementing rules and regulations (IRR) kag bag-uhon ang Republic Act 11235.
