Iloilo City – Aprubado na sa first reading sang Iloilo City Council ang ordinansa nga magapataas sang penalidad sa madakpan nga naga-park nga salakyan sa bicycle lane sa Iloilo City.
Sa interview sang Bombo Radyo kay Iloilo City Councilor Miguel Treñas, proponent sang ordinansa, iya ginpahayagg nga ginatuyo niya nga maamyendaran ang Section 6 sang Regulation Ordinance No. 2016-299 ukon ang Benigno Aquino Avenue bike lane regulation kun sa diin mahimo pataasan sang P5,000 ang penalidad sa mga madakpan nga naka-park sa bike lane.
Nahibaluan nga nagadangat sa P2,000 ang penalidad subong sa mga violators sa Iloilo City, mas manubo kun ipaangid sa gin-propose nga P5,000.
Suno kay Treñas, gin-refer na niya ang amo nga plano sa Committee on Transportation nga ginapamunuan ni Iloilo City Councilor Atty. Sedfrey Cabluna agud mahatagan sang igtalupangod ang isyu sang illegal parking sa syudad.
Ginpahayag dugang sang natungdan nga ang pagpasa sang ordinansa ang mangin palaagyan agud mangin disiplinado ang mga motorista.
