LAMBUNAO, ILOILO– Linibo ka mga motorsiklo nga nagabyahe sa banwa sang Lambunao, ang apektado bangud sa ginpatuman nga pagsulundan sang Land Transportation Office, nga ginadumili-an ang pag-angkas sa motorsiklo.
Sa interview sang Bombo Radyo kay Mayor Reynor Gonzalez, iya ginpahayag nga masobra 10,000 ka mga drivers ang apektado bangud sa nasambit nga pagsulundan.
Suno kay Gonzalez, kalabanan nga transportasyon sang mga pumuluyo sa amo nga banwa ang motorsiklo, rason nga mabudlay ang sitwasyon para sa ila.
Pahayag pa ni Gonzalez,apisar nga may jeep kag van nga nagabyahe, apang may yara sang mga barangay nga motorsiklo lang ang sarang nga makasulod.
Dugang pa sang natungdan, bangud sini, madamo sa mga pumuluyo ang magutuman bangud apektado ang ila palangabuhian.
