Ginhangkat ni Senator Koko Pimentel si Department of Energy Secretary Alfonso Cusi nga maghalin na sa Partido Demokratiko Pilipino–Lakas ng Bayan (PDP-Laban).
Si Pimentel amo ang executive vice chairman sang PDP-Laban.
Suno kay Pimentel, natukiban na nila nga may yara sang sekreto nga kandidato sanday Cusi kag luyag lang nga gamiton ang PDP-Laban.
Mas maayo pahayag sang senador nga paguwaon sang grupo nanday Cusi ang pangalan sang kandidato nga ila suportahan kag indi lang ini pagtagu-taguon.
Ang ginatumod ni Pimentel amo si Davao City Mayor Sara Duterte-Carpio nga plano nanday Cusi nga suportahan sa pagka-presidente.
Pahayag sang senador, hilway ang sin-o man nga luyag magsulod ukon maghalin sa partido.
Samtang nagapanindugan naman ang deputy secretary general nga si Atty. Melvin Matibag nga wala sila sang sala ni Cusi kag indi sila maghalin sa partido apisar nga ginsipa na sila sa pwesto ni Senator Manny Pacquiao.
Suno kay Matibag, tagsa ka partido may yara sang kinamatarong nga magpili kun sin-o ang ila luyag nga mangin presidente kag ini ang paga-istoryahan sa national assembly kag pagkatapos sini, may convention pa nga patigayunon sa Setyembre.
Nahibaluan nga sa bwas, Hulyo 16 kag Hulyo 17 may patigayunon nga national assembly ang grupo ni Cusi sa diin maga-eleher sang bag-o nga opisyal ang PDP-Laban.
Ginalauman nga may yara sang matabo nga sipaay sa pwesto sa grupo naman ni Pacquiao.
