Nagdangat na sa 227,051 ang nabakunahan na batok sa COVID-19 sa Western Visayas.
Sa interview sang Bombo Radyo kay Dr. Bea Natalaray, pinuno sang Non-Communicable Disease Sector sang Department of Health (DOH) Region VI, iya ginpahayag nga ang nasambit nga numero ang katumbas sang 16.38% nga target nga bakunahan sa Rehiyon VI.
49, 756 naman diri ang fully vaccinated na ukon nakabaton na sang first kag second dose sang COVID-19 vaccine.
Suno kay Natalaray, sa mga fully vaccinated, 47, 492 diri ang naggamit sang Sinovac brand kag 2, 264 naman sa Astrazeneca brand sang COVID-19 vaccine.
Yari ang data sang mga nakabaton na sang first kag second dose sang COVID-19 vaccines sa Western Visayas:
- Aklan nga may 17,904 ka pumuluyo nga nakabaton na sang first dose kag 3,931 sa second dose;
- Antique nga may 16,434 sa first dose kag 4,024 sa second dose;
- Bacolod City nga may 25,389 sa first dose kag 5,600 sa second dose;
- Capiz nga may 22,847 sa first dose kag 6,242 sa second dose;
- Guimaras nga may 6,944 sa first dose kag 1,418 sa second dose;
- Iloilo Province nga may 60,531 sa first dose kag 11,751 sa second dose;
- Iloilo City nga may 37,279 sa first dose kag 9,390 sa second dose; kag
- Negros Occidental nga may 39,723 sa first dose kag 7,444 sa second dose;
Samtang, ginpahayag ni Natalaray nga ginakolekta kag ginavalidate pa sang DOH ang data sang mga nagpositibo sa COVID-19 nga nabakunahan na sang first dose kag second dose batok sa amo nga virus.
Ginatsikyar man suno kay Natalaray ang ‘timing’ sang pagpositibo sang COVID-19 patients sa diin ginalantaw kun bala nakabatyag ang mga ini sang sintomas sang virus bag-o nagpabakuna.
Gina-isip man suno sa natungdan ang adlaw kun san-o nalatnan sa COVID-19 ang isa ka pasyente nga nabakunahan na agud matumod kun nagdevelop na ang anti-bodies sa lawas sini humalin sang nakabaton sang bakuna.
Gin-ako man ni Natalaray nga nakabaton na sila sang mga report nga may nagpositibo sa COVID-19 apisar nabakunahan na batok sa virus apang ini ang subject pa sa subong for verification.
