Nagnubo ang numero sang mga nabaligya nga salakyan sa bulan sang Hunyo subong nga tuig, apang padayon nga naga-rekord ang double-digit annual increase.
Suno kay Chamber of Automotive Manufacturers of the Philippines Incorporated President Atty. Rommel Gutierrez, nagdangat sa 36,311 ka mga units ang nabaligya nga motor vehicle subong nga Hunyo.
Ini ang mas manubo naman sang 4.9% kun ipaanggid sa 38,177 units nga nabaligya sang Mayo, apang 27.0% nga mas mataas sa 28,601 units nga nabaligya sang Hunyo 2022.
Ang pinakadamo nga units nga nabaligya amo ang mga commercial vehicles nga may 27,325 units, ginasundan sang light commercial vehicles nga may 21,555 units, kag passenger cars nga may 8,986 units.
Ini ang ginasundan sang Asian utility vehicles nga may 4,864 units, light trucks nga may 546 units, kag trucks kag buses nga may 360 units.
Ang latest figures ang nagapakita sang year-to-date sales nga 202,415 units, nga mas mataas sang 30.7% sa 154,874 nga units nga nabaligya sang 2022.
