Ginapangita sang Iloilo City Government ang mga una nag-surface nga reklamo nga tatlo tubtob lima gid ka sakay ang kinahanglan antes makalab-ot sa destinasyon sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga maayo gid kun maistoryahan ini nga concern agud mahibaluan man sang syudad kun ano ang i-adjust kag kun ano ang dal-on sa pag-amyendar sa Local Public Transport Route Plan (LPTRP).
Manug-isa ka semana na halin sang ginpatuman ang LPTRP sa syudad kag suno kay Conlu, gina-cater man sang PSTMO kag sang concerned offices kun may yara sang driver’s association, mga commuters, kag iban nga grupo nga nagakinahanglan sang diskusyon agud mahibaluan ang pwede kag indi pwede nga bag-uhon sa mga bag-o nga ruta.
Ginpahayag man ni Conlu nga ginatinguhaan gid nga madamo sa gihapon ang units sang jeep nga nagabiyahe kun gab-i agud nga indi man magab-ihan ang tawo sa paghulat sang masarangan sakyan.
Isa sa ginkabig development subong nga semana amo ang nadihon nga win-win solution sang Iloilo City Government kag ang mga stakeholders nga apektado sang pagkadula sang ruta sang jeep nga Lapuz-Iloilo City and vice versa.
Suno kay Conlu, ginpasugtan liwat nga may mga traditional jeepney units sang Bo. Obrero -City Proper Loop nga magasulod sa Lapuz agud magkuha kag magpasakay sang pasahero.
Gin-athag man ni Conlu nga ang rason kun ngaa wala gin-aprubahan sang LTFRB nga dal-on sa new and rationalized routes ang Lapuz-Iloilo City and vice versa amo ang makitid ang dalan para sa mga modernized jeepneys.
Suno kay Conlu, indi lang anay pagpasudlon ang modernized jeepneys sa amo nga mga lugar bangud indi makaliso kag designed ang LPTRP sa pagbyahe sang modernized jeepneys.
