ILOILO CITY- Mas nagdamo pa gid ang naga-retail sang isda sa Iloilo Fish Port Complex sa Tanza Baybay, Iloilo City Proper nga ginareklamo kag ginakabig nga ka-kompetensya sang mga fish vendors sa mga merkado publiko sa Syudad sang Iloilo.
Sa interview sang Bombo Radyo Iloilo kay Mr. Charlie Chan, presidente sang Federation of Market Vendors sa syudad, iya ginpahayag nga alas-siete tubtob alas-dies sang gab-i, madamo na sang naga-retail sang isda sa fishport complex.
Ini ang rason suno kay Chan nga malaka nalang ang nagapadulong sa merkado agud magbakal sang isda nga nagaresulta sa mas manubo nga kita kag indi maubos nga isda sang mga fish vendors sa mga public market.
Ginpahayag ni Chan nga natalana naman nga sapulon sang Local Economic Enterprise Office sa pagpamuno ni Mr. Ariel Castañeda ang tanan nga fish vendors sa syudad.
Nagaplano naman Federation of Market Vendors sa pagpamuno ni Chan nga magsulat sang position letter kag ipasa kay Iloilo City Mayor Jerry Treñas agud mapalab-ot sa alkalde ang ila reklamo.
