ILOILO CITY – Madamo ang nagahingagaw sa pagbakal sang palupok para sa New Year’s Eve.
Sa interview sang Bombo Radyo kay Punong Barangay Nestor Muñoz sang Salvacion Habog-Habog, Molo, Iloilo City kag manugbaligya sang palupok, iya ginpahayag nga sa tion sang hapon tubtub gab-i nagadagsa ang nagabakal sang palupok.
Suno kay Muñoz, maayo man ang bentahanay kag indi man siya mapiyerde sa P500,000 nga kapital para sa 4 niya ka pwesto.
Ginpahayag ni Muñoz nga mas madahog ang baklanay sa Muelle Loney sa City Proper kun ipaanggid sa iya pwesto sa distrito sang Jaro.
Nagadepende naman ang presyo sa kadamuon kag sahi sang palupok.
Magluwas sa palupok, nagabaligya man ang natungdan sang torotot.
Wala naman nagapati ang natungdan nga ang pagpalupok sang firecrackers sa pagsaulog sang bag-ong tuig ang nagatabog sang malain nga espirito kundi nagadepende ini sa pagpanikasog sa pagpangabuhi.
