Bisan wala sang dala nga warrant of arrest, mahimo nga arestuhon sang otoridad ang madakpan nga nagabaligya kag nagabakal sang boto.
Sandig ini sa Resolution No. 11104 nga gin-release sang Commission on Elections (COMELEC) nga amo ang nagapasangkad pa sang otoridad sang Committee on “Kontra-Bigay” nga mag-monitor sa vote buying and selling sa 2025 elections.
Sa idalom sini nga resolution, ginatugutan ang law enforcer nga magpatigayon sang warrantless arrest kun nadakpan sini sa akto nga nahimo ang nasambit nga election offence.
“Any law enforcement officer may, without a warrant, arrest a person when, in his or her presence, the person to be arrested has committed, is actually committing, or is attempting to commit the election offense of vote-buying and vote-selling or act constituting ASR (abuse of state resources),” base sa nakasaad sa resolution.
Ang arestado nga indibidwal ang dapat nga dal-on sa pinakamalapit nga estasyon sang pulis.
Dapat man itugyan sa kustodiya sang pulis ang mga materyales nga gingamit sa vote buying kag vote selling kaangay sang kuwarta ukon iban pa nga goods of value, sample ballots kag iban pa nga campaign materials.
Kun basehan ang Omnibus Election Code, ang vote buying amo ang akto kun sa diin ang tawo ang nagahatag nagatanyag, ukon nagapromisa sang kuwarta ukon anuman nga may balor — direkta man ukon indi — para nga mahaylo ang iban nga magboto sa isa ka kandidato ukon sa tuyo man nga magkampanya nga indi pagbotohon ang isa ka kandidato.
Ang vote selling naman amo ang akto kun sa diin may tawo naga-solicit ukon nagabaton — direkta man ukon indi — sang kuwarta ukon anuman nga expenditure kabaylo sang pagboto para sa kandidato ukon para nga indi pagbotohon ang isa ka tawo.
