ILOILO CITY – Indi na pagbatunon ang mga nagabusong nga iloy sa mga quarantine facilities sa syudad sang Iloilo.
Ini ang nalakip sa official statement ni Iloilo City Mayor Jerry Treñas may kaangtanan sa reklamo sang pamilya sang COVID-19 positive nga iloy tuhoy sa kapabayaan sang mga medical staff sang St. Therese MTCC Hospital nga nagaserbe nga quarantine facility.
Suno kay Public Safety and Transportation and Management Office Head Jeck Conlu nga nagaserbe man nga COVID-19 team spokesperson, ang protocol amo nga indi magbaton ang mga quarantine facilities sang mga nagabusong nga iloy bangud nga makabig sila nga vulnerable sector.
Bangud nga wala sang may nagbaton nga hospital sa nasambit nga pasyente, napilitan ang pamunu-an sang St. Therese MTCC Hospital nga batunon ang nasambit nga COVID-19 positive kag hulaton ang due date.
Sa tion nga magbata na ang pasyente, amo na ugaling kag pagadal-on sa hospital agud nga mahatagan sang nagakaigo nga medical attention.
Nakuhaan na sang swab sample kag nagapaidalom na sa quarantine ang duha ka doktor nga nag-assist sa nagbata nga COVID-19 positive.
Sa subong suno kay Conlu, ginalauman nga magnegatibo lang sa virus ang nasambit nga doktor bangud nga ginakulang man ang medical staff sa syudad sang Iloilo.
