ILOILO CITY – Ginaproblemahan subong sang mga transport cooperatives ang mga nagabyahe nga mga colorum nga jeep.
Sa interview sang Bombo Radyo kay Rizalito Alido, spokesperson sang Iloilo City Alliance Operators and Drivers Transport Cooperative, iya ginpahayag nga mangin ang Land Transportation Franchising and Regulatory Board Region VI ang nagaproblema man sini bangud nga wala sila sang impounding area.
Suno kay Alido, makaduha ka beses sa isa ka semana nga nagapatigayon sang operasyon ang Land Transportation Franchising and Regulatory Board Region VI apang tubtob lamang sila sa warning.
Ginakabalak-an sang kooperatiba nga mabalik man sa gihapon sa dalanon ang mga colorum nga jeep kun indi pag-impound sang ahensya.
Ang mga colorum nga jeep ang makabig nga kompetensya sang kooperatiba kag naga-apekto sa ila nga income.
Nagpanawagan man si Alido sa senado kag kongreso nga dapat nga dugangan ang pondo kag mga tawo sa Land Transportation Franchising and Regulatory Board Region kag Land Transportation Office agud nga mangin efficient ang mga ini.
Samtang, daw kaangay nga nalawlawan si Alido sa performance sang Land Transportation Franchising and Regulatory Board Region VI bangud nga sa 4 out of 10 lamang ang rating sini sa ahensya.
