Ginapatihan nga halin sa kaiping nga banwa ang kalabanan sang mga nagagamit sang magahod nga modified mufflers ukon tambutso sa Iloilo City.
Suno kay Public Order and Safety Management Office (POSMO) kag Iloilo City Traffic and Transportation Management Office (ICTTMO) Head Retired Colonel Uldarico Garbanzos, nakabaton sila sang reports sang mga pumuluyo kaangot sa magahod nga tambutso nga nagadisturbo, ilabi na sa tion sang pagpahuway kun gab-i.
Bangud sini, padayon ang random operations sang ICTTMO, sa koordinasyon sa Iloilo City Police Office (ICPO), batok sa mga nagalapas sang Anti-Modified Muffler Ordinance.
Suno kay Garbanzos, ginaprayoridad sang mga otoridad ang mga lugar nga may madamo nga reklamo, lakip na ang Benigno Aquino Avenue sa Mandurriao kag amo man sa distrito sang Jaro.
Ginpahayag man sini nga nagapati sila nga nagasulod sa siyudad ang mga violators halin sa mga kaiping nga banwa, bangud halos wala na sang nagabaligya sang modified mufflers sa sulod sang Iloilo City.
Ginasuportahan ini sang records sang 2025, nga nagapakita nga kalabanan sang nadakpan nga violators nagikan sa probinsya sang Iloilo.
Sa subong nga tuig, apat na ang narekord nga accomplishments sang operasyon, ipaanggid sa 44 halin Hulyo tubtob Disyembre sang nagligad nga tuig.
Dugang pa ni Garbanzos, indi lamang mga motorsiklo ang nagagamit sang magahod nga tambutso, kundi pati traditional jeepneys, nga nagahatag sang dugang nga pagpanghangkat sa pagpatuman sang regulasyon, ilabi na sa pagkumpiskar sang mga illegal mufflers.
Sa idalum sang Iloilo City Anti-Modified Muffler Ordinance, ukon Regulation Ordinance No. 2017-087 kag No. 2023-071, ginadumilian ang mga tambutso nga nagalapas sa 99-decibel limit, halin sa nauna nga 150-decibel limit.
Exempted ang mga motorsiklo nga may 400 cc pataas nga engine displacement.
Ang mga violators magapangatubang sang multa nga P1,000 sa first offense; P2,000 kag confiscation sang muffler sa second offense; kag P5,000, confiscation kag pagguba sang illegal muffler sa third offense.
Mahimo man nga ma-revoke ang business permit sang mga establisemento nga nagabaligya sang modified mufflers.
Ginapaabot ni Garbanzos nga magpatigayon man sang crackdown operations ang mga kaingod nga banwa agud mapunggan ang paggamit sang illegal nga tambutso kag malikawan nga madisturbo ang pagpahuway sang mga pumuluyo sang Iloilo City.#
