ILOILO CITY – Gina-imbestigaran na sang Commission on Elections (COMELEC) ang nagaguluwa nga informal exit polls nga kuha sa overseas voting sites nga nagsugod na sang Domingo, Abril 10.
Ini matapos man sang nagguluwa nga post sa social media nga nagapakita sang nangin boto sang mga OFW nga naglinya sa polling site sa Hong Kong.
Sa ginpatigayon nga forum sang Legal Network for Truthful Elections (LENTE), ginpahayag ni Sonia Bea Wee-Lozada, director sang Overseas Voting (OFOV) sang COMELEC nga nakalab-ot na ini sa ila igtalupangod.
Una na nga ginpahayag ni COMELEC spokesperson James Jimenez nga ang “exit poll” ang indi makabig nga opisyal nga resulta sang 2022 National and Local Elections.
Suno kay Jimenez, ang mga boto ang isipon pagkatapos sang Overseas Voting sa Mayo 9 pagkatapos nga masirado na ang pagboto.
Ang exit polls ang ginapanugutan sa idalom sang Fair Election Act ukon Republic Act No. 9006, apang ini ang mahimo gid lamang nga mapagwa pagkatapos sang eleksyon kag indi makabig nga opisyal.
Nagpaandam man si Jimenez nga indi magpati sa mga exit polls sa social media.
Suno naman kay Wee-Lozada, ang reports nga natuhoy sa exit poll ang mahimo nga mapadangat sa Task Force Kontra Fake News agud nga ma-imbestigaran.
Nahibaluan nga nagdangat sa 1.7 million ang registered overseas voters para sa May 2022 elections.
