ILOILO CITY – Nagadugok ang mga tumuluo sa Balaan Bukid sa Jordan, Guimaras nga isa sa mga ginakadtuan tagsa ka Semana Santa.
Santu sa monitoring sang Guimaras Provincial Police Office (GPPO), kapin 2,000 na ang nagpadulong sa Balaan Bukid sini gid lang nga aga para sa Station of the Cross.
Tuman kalaba sang pila sa Ortiz Wharf kun sa diin naga-agi ang mga tumuluo nga magapadulong sa amo nga bukid.
Nagpatuman naman sang color coding sa mga sakayan dagat nga nagabiyahe kun sa diin may yara sang diretso sa Jordan Wharf samtang may yara man sang nagadiretso sa tiilan sang bukid.
Balewala sa mga tumuluo ang tuman kainit nga tiyempo kag ang pagsaka sa bukid ang kabahin na sang ila sakripisyo.
Nagluntad naman ang sunog sa Station 4 sang Station of the Cross bangud sang kandila nga ginasindi sang mga tawo apang gilayon man ini nga napalong.
Buwas, Biyernes Santo, ginalauman ang pagdugok sang mas madamo nga mga tawo sa Balaan Bukid para sa Pagtaltal 2018 ukon ang paglansang kay Hesus sa krus.