ILOILO CITY – Nagdamo ang mga nagpadulong sa syudad sang Iloilo apisar sang Enhanced Community Quarantine.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga subong nga adlaw, Mayo 4, madamo ang mga salakyan nga nakita sa palibot sang syudad sang Iloilo.
Suno kay Conlu, kalabanan ang naghalin sa iban nga probinsya sa Panay nga ginpaidalom na sa General Community Quarantine kag ang kalabanan ang may yara sang transaksyon sa mga bangko.
Ginpahayag ni Conlu nga bangud sa ginapatuman nga adjustment kasubong sang physical distancing, mahinay ang dalagan sang transaksyon.
May kaangtanan naman sa pagtapos sang Enhanced Community Quarantine sa Mayo 16, ginpahayag sang natungdan nga ginatun-an sang traffic team kun ano nga scheme ang patigayunon agud nga wala sang pagdinaguso.
Lauman man nga umpisa buwas nga adlaw, Mayo 5, may yara sang adjustment nga ipatuman sa palibot sang Iloilo Terminal Market kun sa diin masami nga nagadagsa ang mga manugbakal.
Sakop sang closure amo ang:
- Mabini Street, Rizal to De Leon St.
- De Leon Street, Mabini to Fuentes St.
- Fuentes Street, Rizal to De Leon St.
- Rizal Street, Rizal/Quezon kag Rizal/Jalandoni Sts.
Santo sa Regulation Ordinance 2020-063 nga ginpasar sang Iloilo City Council, ang closure ang magalawig tubtub sa Disyembre 31 bilang kabahin sang Enhanced Community Quarantine kag agud nga hatagan sang ligwa ang disinfecting measures batok sa Coronavirus Disease 2019 (COVID-19).
