Ginarespeto sang mga manugpangisda sa Iloilo River ang ordinansa sang syudad nga nagadumili sang pagpangisda sa sulod sang apat ka bulan.
Ini kaangot sang closed fishing season nga maga-umpisa sa Disyembre 1 tubtob Marso 31, 2026.
Sa interview sang Bombo Radyo kay Nonoy Cielo, isa ka manugpamunit sa Muelle Loney, iya ginpahayag nga kun igamandu sang syudad nga untaton ang pagpangisda, wala sila sang mahimo kundi magrespeto sini kag mangita anay sang iban nga obra.
Suno sa iya, bisan pa nga kabuhian para sa iban ang pagpamunit, may ara man sang nagahimo sini bilang kalingawan lang.
Sandig sa Regulation Ordinance No. 2025-027, iga-establisar ang closed fishing season sa Iloilo River halin sa Drilon Bridge tubtob Diversion Bridge para sa fish stock restoration, livelihood improvement kag paghatag sang proteksyon sang river biodiversity.
Suno sa ordinansa, ang maglapas sini ang magatubang sang masunod nga penalidad:
1st offense: multa nga ₱1,000 ukon community service
2nd offense: multa nga ₱2,000 ukon community service
3rd offense: multa nga ₱5,000 kag confiscation sang catch kag fishing gears kag pag-impound sang fishing boat.
