Nagawangal ang mga nagapanag-iya sang duta nga ginapahayag ginapatigayunan sang quarry ukon pagkuha sang mga balas kag bato sa Brgy. Madong Janiuay, Iloilo.
Ang quarry operators nga ginareklamo amo sanday Jose Elmer Camarista kag Punong Barangay Teodoro Camarista sang Brgy. Tolarucan, Mina, Iloilo.
Matandaan nga ginpanindugan sang quarry operators nga ang permitted area nga nasaad sa permit nga gin-isyu sang Provincial Environment and Natural Resources Office amo lang ang ila gina-quarry.
Sa interview sang Bombo Radyo kay Delia Labor, tagreklamo, iya ginpahayag nga nadala ang ila duta sa quarry sa diin bangud diri, madugay naman nga nag-untat ang pagtubod sang ila nga bomba.
Wala man suno kay Labor sang kaathagan kag pat-od nga solusyon ang Provincial Environment and Natural Resources Office sa ila reklamo.
Suno kay Labor, ang luyag lamang kuntani nila amo ang untaton na ang quarry sa ila nga lugar.
Samtang suno naman kay Reynato Habana, nga isa man sa nagapanag-iya sang duta kag una na nagpa-Bombo natuhoy sa ginapahayag indi husto nga quarrying sa iya nasakupan nga duta, dako nga palamangkutanon para sa iya kun ngaa wala siya mapahibalo antes nagpatigayon sang quarry sa ila lugar.
Sa interview sang Bombo Radyo kay Habana, iya ginpahayag nga kuntani ginkonsulta anay sila nga mga registered owners antes ginkuhaan sang mga balas kag bato ang ila nasakupan nga duta.
Suno kay Habana, wala man kuntani sang problema kun ginpahibalo lamang sila kag ginasunod sang quarry operators ang nasaad sa ila nga permit nga isa ka metros lamang sang balas kag bato ang ila kutkuton kag kuhaon.
