Mas mataas ang risgo nga malatnan sa COVID-19 ang mga smokers ukon nagapanigarilyo.
Sa interview sang Bombo Radyo kay Dr. Maria Luisa Kanapi, Pediatrician sa Medicus Medical Center, iya ginpahayag nga ang akto sang pagpanigarilyo amo ang pagtapik sang mga tudlo sang kamot sa bibig nga amo ang nagapataas sang posibilidad sang transmission sang COVID-19.
Suno kay Dr. Kanapi, kadam-an sang mga biktima sa COVID-19 sa Pilipinas amo ang lalaki kag mga tigulang.
Santo sa data, 42% sang adult Filipino nga lalaki ang smokers kag kapin isa ka milyon diri ang vapers ukon nagagamit sang electronic cigarette.
Ginpahayag ni Kanapi nga ang mga nagapanigarilyo ang may mataas man nga risgo sa lung disease ukon balatian sa baga kag viral pneumonia.
Ang mga tawo nga may balatian sa baga kag pneumonia ang may mas mataas man nga risgo nga matapikan sang COVID-19.
Delikado man ang mga indibidwal nga makahaklo lamang sang aso sang sigarilyo bangud ini ang makabig nga secondhand smoke kag ang resulta sini sa lawas, ang kaangay man sang isa ka tawo nga smoker.
Samtang ang thirdhand smoke naman amo ang aso nga nagatapik sa mga butang kaangay sang pulungkuan.
Bangud diri, hugot nga ginapanugyanan sang doktor ang publiko nga mag-untat sa pagpanigarilyo kag likawan man ang secondhand smoke nagikan sa aso sang vape ukon regular nga sigarilyo.
Samtang, suno naman kay Dr. Joje Undar, Pediatrician sa Iloilo Mission Hospital, ang electronic cigarette ukon vape ang may yara sa gihapon sang liquid nga sahi sang nicotine nga makaguba sa ikaayong lawas sang isa ka tawo.
Pahayag ni Dr. Undar, ang nicotine ang makatuga sang dalagko nga health problems sa diin makapalala ini sang blood pressure nga nagaresulta sa heart attack.
Ang aso nga halin sa vape, ang makatuga sang inflammation ukon pagbanog sang tissues sa baga.
Abiso sang doktor, likawan ang tanan nga sahi sang pagpanigarilyo bangud ang aso nagikan diri ang makahatag sang nagkalain-lain nga balatian sa makasimhot ilabi na sa mga kabataan nga amo ang ginakabig vulnerable kag sensitibo sa secondhand smoke.
Dugang pa ni Undar, sa tion nga may yara na sang nanuhay-tuhay nga balatian ang isa ka tawo tuga sang pagpanigarilyo, mas mahapos ini nga matapikan sang lapnagon nga COVID-19.
