Iloilo City – Naglab-ot na sa pulo ka mga empleyado ang gina-imbestigaran sang Iloilo City Government matapos ang alegasyon nga nagapautang ang mga ini sa mga job hires.
Sa interview sang Bombo Radyo kay Mayor Jerry Treñas, iya ginpahayag nga gikan sa nagkalain-lain nga departamento kag opisina ang mga gina-imbestigaran.
Suno sa alkalde, napatawag na ang mga ini, apang wala pa nakapasa sang affidavit agud madepensahan ang kaugalingon.
Dugang pa sang natungdan, nagahulat ini sang findings kag rekomendasyon sa City Legal Office.
Kaangot diri, wala naman sang nakit-an nga problema ang alkalde sa swelduhanay sang mga City Hall employess bangud sa madasig nga submission sang payroll.
Pahayag ni Treñas, mahimo niya mapanyagahan ang pinakauna nga departamento nga makapasa sang payroll sa mga job hires.
Samtang, may yara naman sang apat ka mga empleyado nga nakumpirma ang Iloilo City Legal Office nga nagapautang.
Sa interview sang Bombo Radyo kay Atty Joseph Edward Areño, Attorney II sang City Legal Office, iya ginpahayag nga indi pa mapangalanan ang nasambit nga mga empleyado.
Suno kay Areño, may yara sang ginapatigayon nga fact finding ang opisina agud matumod ang mga nalakip nga mga indibidwal.
Ginpahayag dugang sang natungdan nga magadepende kay Mayor Treñas kun ano ang pagahimuon sini sa tion nga may yara na sang findings ang imbestigasyon.
