Indi pagpahanugutan nga makasulod sa syudad sang Iloilo ang mga Indian National nga nagapanukot kag nagasakay sa motorsiklo.
Sa interview sang Bombo Radyo kay Police Col. Uldarico Garbanzos, Director sang Iloilo City Police Office (ICPO), iya ginpahayag nga nasaad sa pagsulundan kasunod sang pagpaidalom sang syudad sa modified enhanced community quarantine (MECQ) status nga nalakip sa mga non-essential ang mga Indian national.
Suno kay Garbanzos, bangud sini, istrikto nila nga ginapabalik ang mga Indian national sa ila mga lugar kun maglabay ang mga ini sa mga border control point sang syudad apisar may yara pa ang mga ini sang dala nga travel pass.
Matandaan nga una diri, may mga reklamo nga nabaton ang Bombo Radyo nga nagapahayag nga kuntani indi anay pagpahanugutan ang Indian Nationals sa pagpadulong sa probinsya sang Iloilo, bangud posible carrier ang mga ini sang COVID-19 bangud sang ila lain-lain nga destinasyon.
