MANILA – May bag-o nga mga pagsulundan para sa pag-angkas sa motorsiklo sa mga lugar nga napaidalom sa general community quarantine (GCQ) lakip na sa syudad sang Iloilo.
Santo sa bag-o nga mga protocol nga gin-release sang National Task Force for COVID-19 kahapon nga adlaw, Agosto 18, ginapahanugutan na ang mga riders nga nagapuyo sa isa ka balay nga mag-angkas sa motorsiklo apisar wala sang barrier.
Apang para sa mga tawo nga wala nagapuyo sa isa ka balay, kinahanglan sa gihapon ang barrier nga ang prototype amo ang daw backpack nga design sang ride-hailing company nga Angkas.
Sa amo man nga pagsulundan, nakasaad nga kinahanglan nga isa ka authorized personnel outside of residence (APOR) ang backrider samtang mahimo naman nga isa APOR ukon indi APOR ang driver.
Ang duha nga nagasakay sa motorsiklo ang dapat magsuksok sang full-face helmets kag face masks, kag dapat nga privately-owned ang motorsiklo kag indi ‘for hire’.
Suno pa sa National IATF, discretion na sang local government units sa mga lugar nga napaidalom sa modified general community quarantine (GCQ) kun ipatuman man ang kaangay nga mga pagsulundan kag dapat nga nakadepende sa sitwasyon.
Nahibaluan nga sa Pilipinas, napaidalom sa GCQ tubtob sa Agosto 31 ang mga masunod: National Capital Region (NCR) kag kaiping nga mga probinsya nga amo ang Bulacan, Laguna, Cavite, kag Rizal; Nueva Ecija, Batangas, Quezon, Iloilo City, Cebu City, Lapu-Lapu City, Mandaue City, Talisay City, Minglanilla, Cebu kag Consolacion, Cebu.
Ang nabilin nga bahin sang pungsod ang yara sa MGCQ.
