ILOILO CITY – Gin-athag sang Russia nga indi mangin kabahin ang mga nagatrabaho sa bangko, mga information technology workers, kag mga journalists nga i-draft sa army agud nga magserbe sa Ukraine sa mobilization nga ginpatuman ni President Vladimir Putin.
Una na nga ginpahayag ni Defense Minister Sergei Shoigu nga kinahanglan sang Russia ang dugang nga 300,000 troops para sa inaway sa Ukraine nga ginatawag nga “partial mobilization”.
Suno sa defense ministry, ang pila ka mga empleyado nga nagatrabaho sa mga importante nga mga industriya ang wala nalakip sa draft agud nga mapasiguro ang trabaho sa specific high-tech industries kag subong man, sa financial system sang Russia.
Ang exceptions ang naga-apply sa pila ka mga IT workers, telecommunications workers, finance professionals, kag subong man sa mga empleyado sang mass media outlets kag interdependent suppliers lakip na ang mga rehistrado nga katapo sang media.
Ang mga pinuno sang kompaniya ang maga-draft sang listahan sang ila mga empleyado nga nalab-ot ang criteria kag mahimo nga ma-exclude sa draft.
