ILOILO CITY – Nagwangal ang pila ka mga residente sa distrito sang Mandurriao matapos ginbalabagan kag wala ginpasulod sa Mandurriao Catholic Cemetery pasado 6:00 subong nga gab-i, Oktubre 29.
Ini bangud santo sa Executive Order ni Iloilo City Mayor Jerry Treñas, siraduhon ang tanan nga pampubliko kag pribado nga patyo sa syudad umpisa bwas, Oktubre 29 (12:01 AM) tubtob Nobyembre 4 (11:59 PM).
Apang kaina sang kasisidmon, nagkontento na lang ang mga tawo sa pagsindi sang kandila sa gwa sang gate bangud indi na sila pagpahanugutan nga makasulod sa patyo.
Sa interview sang Bombo Radyo kay Barangay Tanod Commander Emiliano Jamili sa Barangay Oñate de Leon, iya ginpahayag nga ginsunod lang sang mga tanod members ang mandu sang mga kapulisan nga siradhan ang patyo umpisa 6:00 sa gab-i.
Bangud sini suno sa tanod commander, sila nga mga tanod ang nagasalo sang reklamo sang mga tawo nga nagasalangisag kun ano nga husto nga oras ang ila sundon.
Sa interview naman sang Bombo Radyo kay Punong Barangay Willie Colon sang Barangay Oñate de Leon, iya ginpahayag nga sila ang una nga barangay nga nakadesignar nga magbantay sa patyo subong nga pista minatay.
Ginpahayag man sang punong barangay nga sundon lang nila kun ano ang mandu sang PNP personnel sa amo nga distrito.Una naman nagpahayag si Mayor Jerry Treñas nga may igadeploy nga mga PSTMO personnel sa mga patyo sa syudad.
